“İnnovativ Həllər Marafonu 2025”in mövzusu elan edildi

OBA SİD innovativ ideyaların dəstəklənməsi və müştəri təcrübəsinin daha da yaxşılaşdırılması məqsədilə keçirilən “İnnovativ Həllər Marafonu”nun mövzusunu elan edir. Bu ilki mövzu Müştəri məmnuniyyəti olaraq müəyyən edilmişdir.

Marafonda iştirak edəcək komandalar müştəri yönümlü həllər təklif etməklə həm OBA MMC-nin xidmət keyfiyyətinə, həm də ümumilikdə Azərbaycanın innovasiya ekosisteminin inkişafına töhfə vermək imkanı qazanacaqlar.

Mövzu üzrə istiqamətlər:

1. “Qonşu market” konsepsiyasının inkişafı

OBA marketləri hər gün yüz minlərlə insanın qısa müddətli və gündəlik alış-veriş ehtiyaclarını qarşılayır. Bu istiqamət iştirakçılardan qonşuluqda yaşayan insanların həyat tərzini nəzərə alaraq “kiçik, tez və rahat” alış-veriş vərdişlərini daha da möhkəmləndirəcək həllər təklif etməyi hədəfləyir. Məqsəd – müştərinin evinə ən yaxın və əlçatan seçim olaraq OBA-nın mövqeyini gücləndirməkdir.

2. Müştəri məlumatlarının səmərəli istifadəsi

OBA-da hər gün yüz minlərlə müştəri alış-veriş edir. Onların seçimləri, məhsul zövqləri, alış vaxtı və tezliyi kimi məlumatlar rəqəmsal texnologiyalar vasitəsilə dəyərləndirilə bilər. Bu istiqamət süni intellekt və CRM texnologiyalarından istifadə etməklə müştərilərə fərdi yanaşmanı necə inkişaf etdirmək barədə ideyaların hazırlanmasını nəzərdə tutur.

3. Şikayətlərin və məhsul idarəsinin optimallaşdırılması

Müştəri şikayətlərinə gec cavab verilməsi, məhsul qıtlığı və ya artıqlığı kimi hallar həm müştəri məmnuniyyətinə, həm də şirkətin imicinə təsir edə bilər. Bu istiqamət çərçivəsində iştirakçılar süni intellekt əsaslı sistemlərlə anlıq rəylərin toplanması, şikayətlərin avtomatik yönləndirilməsi və eyni zamanda məhsul tələbinin düzgün proqnozlaşdırılması üçün innovativ həllər təqdim etməlidirlər.

4. Sərbəst istiqamət

İştirakçılara əlavə olaraq sərbəst seçim imkanı da verilir. Bu istiqamətdə komandalar müştəri məmnuniyyəti ilə bağlı hər hansı digər problem sahəsini müəyyən edib, həmin problemə innovativ və texnoloji yanaşma ilə həll təklif edə bilərlər.

Son qeydiyyat tarixi: 19 oktyabr 2025

Şirkət xaricindən olan startap komandaları, mütəxəssislər və yaradıcı fərdlər üçün təşkil edilən açıq müsabiqədir. Burada real biznes problemlərinə tətbiq edilə bilən texnoloji və yaradıcı həllər təklif olunur. İştirakçılar öz layihələrini münsiflər qarşısında təqdim edir və ən yaxşı həllər mükafat qazanır.

İnnovativ Həllər Marafonu OBA MMC-nin daxili ehtiyaclarını ödəyəcək və gələcək inkişafına töhfə verəcək yeni texnoloji ideyaların ortaya çıxarılmasında maraqlıdır. Yarış həm gənc istedadların, həm də təcrübəli mütəxəssislərin öz bacarıqlarını nümayiş etdirməsi üçün unikal platforma yaradır.

Komandalar real problemlərə innovativ yanaşmalar təqdim edərək həm özlərini sınayacaq, həm də şirkətin gələcək strategiyasına dəyər qatan həllər formalaşdıracaqlar. Marafonun strukturu ideyaların ilkin təqdimatından başlayaraq mentor dəstəyi, MVP hazırlanması və yekun təqdimata qədər olan bütün mərhələləri əhatə edir.

Əsas hədəf yalnız texnoloji həll tapmaq deyil, həm də davamlı, praktik və sosial baxımdan faydalı layihələr ortaya çıxarmaqdır. İştirakçılar və ümumilikdə pərakəndə satış sektoru üçün bu marafon yeni bilik, təcrübə, şəbəkələşmə və tərəfdaşlıq imkanları qazandıracaq

Mövzu seçimi
İnnovativ Həllər Marafonunun hədəflərindən biri OBA MMC-nin daxili ehtiyaclarını ödəyəcək innovativ texnoloji həllər yaratmaqdır. Bu səbəbdən mövzu təyini daxili strukturlar arasında keçirilən sorğu və əməliyyat komandasının yekun rəyi əsasında formalaşır. Mövzu təyini zamanı dövrün aktual trendləri də nəzərə alına bilər. Mövzu ilə bağlı yekun qərar layihənin sosial şəbəkə hesabları və rəsmi sayt vasitəsilə yayımlanır.

Seçim proseduru
Qeydiyyat mərhələsi əsas kommunikasiya kanallarında marafonun mövzusu elan edilərək start götürür. Əvvəlcədən müəyyən və elan edilmiş son qeydiyyat tarixinə qədər göndərilən sorğular ilkin baxışın keçirilməsi üçün vahid bazada toplanır. Qeydiyyat prosesi üçün Müraciət Edərək sorğuda (SEED Form) qeyd olunan məlumatların doldurulması zəruridir. “SEED Form” layihələrin ilkin ideya mərhələsində təqdim olunması üçün nəzərdə tutulub. Bu sənəd vasitəsilə iştirakçı komandalar müəyyən ediləcək və təqdim olunan ideyalar texnoloji əsaslılığına və uyğunluğuna görə ilkin mərhələdə qiymətləndiriləcək. İlkin mərhələni keçmiş bütün komandalar açılış tədbirində iştirak hüququ əldə edəcək. Seçim zamanı komanda üzvləri üçün yaş, status (tələbə və ya mütəxəssis) məhdudiyyəti qoyulmur.

Reqlament
Marafonun əsas hissəsi 6 həftəlik perioddan ibarətdir. 1-ci həftə. İlkin qiymətləndirmə mərhələsindən keçən bütün komandalar 1-ci həftədə açılış tədbirində iştirak edəcəklər. Açılış tədbirinin əsas məqsədi təşkilatçı və iştirakçı komandaların bir-biri ilə yaxından tanış olması, mövzuya əsasən qoyulan problemlərə dair infosessiyaların təşkilidir. 2-ci həftədən etibarən komandaların onlara təhkim edilmiş mentorlarla tanışlıq mərhələsi baş tutacaq. Mentorlar bütün layihə boyunca komandalarla işləyəcək və əsas vəzifəsi layihələrin uğurla təqdimat mərhələsinə çatmaqda komandalara dəstək olmaqdır. 3-cü həftə komandalar daxili mütəxəssis komandası ilə tanış olacaqlar. Daxili mütəxəssis komandasının əsas məqsədi komandaları şirkətin real problemləri ilə yaxından tanış etmək, layihələrin hədəflərini düzgün istiqamətdə irəliləməsində komandalara dəstək olmaqdır. 3-cü həftə komandalar layihələri çərçivəsində prototip hazırlayaraq “pitch deck” çıxışı edəcəklər. 4-cü həftə mentorlarla işin davamı və layihələr üzrə MVP-nin (Minimum Viable Product) hazırlanma mərhələsidir. Layihələrin yekun təqdimata hazır olması üçün əsas meyar MVP-nin olmasıdır. 5-ci həftə yekun təqdimata hazırlıq həftəsidir. Bu həftə artıq layihələr yekunlaşdırılmalı və yekun təqdimatlar üçün sınaq çıxışlar həyata keçirilməlidir. 6-cı həftə yekun təqdimat günü baş tutacaq. Həmin gündə təqdimat mərhələsinə uğurla çatmış layihələrin münsiflər heyəti qarşısında çıxışı baş tutacaq. Bütün çıxışlar yekunlaşdıqdan sonra növbəti günlərdən birinə yekun tədbir planlaşdırılır və qaliblər həmin tədbirdə elan edilir.

Qiymətləndirmə kriteriyaları
İnnovativ Həllər Marafonunda layihələrin yekun qiymətləndirilməsi İnnovasiya Komitəsi tərəfindən aparılacaq. Komitə OBA MMC-nin idarə heyətinin üzvləri və müstəqil ekspertlər tərəfindən formalaşdırılacaq. Qiymətləndirmə aşağıdakı kriteriyalar əsasında hesablanacaq:

1. Problemin qoyuluşu. Layihə həll etməyə çalışdığı problemin aktuallığını və real ehtiyacını açıq göstərməlidir. Problemin düzgün müəyyən edilməsi, həllin şirkət üçün praktiki və strateji əhəmiyyətini ortaya qoyur. Qiymətləndirmə zamanı, problem nə qədər vacib və ölçülə bilən olarsa, layihənin uğur şansı bir o qədər yüksək qiymətləndiriləcək. Komandalar problemi aydın və dəqiq ifadə etməlidirlər.
2. Layihənin innovativliyi. Layihənin bazarda mövcud həllərdən nə ilə fərqləndiyi və yaradıcı yanaşması qiymətləndirilir. Yeni texnologiyaların tətbiqi, qeyri-ənənəvi metodlar və unikal ideyalar əsas meyarlardır. İnnovativlik, həm layihənin rəqabət qabiliyyətini artırır, həm də şirkətin texnoloji liderliyini möhkəmləndirir. Komandalar öz ideyalarını fərqli və yaradıcı şəkildə təqdim etməlidirlər.
3. İqtisadi səmərəlilik. Layihə tətbiq olunduqda resursların səmərəli istifadəsini və praktiki fayda təmin etməsini göstərməlidir. Bura maddi, vaxt və əməliyyat resurslarının optimallaşdırılması, həmçinin şirkətin iş proseslərini yaxşılaşdırmaq imkanları daxildir. Qiymətləndirmə zamanı layihənin real resurs sərfiyyatı və effektivliyi nəzərə alınır. Komandalar layihənin səmərəli və praktik tərəfini əsaslandırmalıdırlar.
4. Texnoloji əsaslılıq və tətbiq imkanları. Layihə texnoloji baxımdan praktik və reallaşdırıla bilən olmalıdır. Prototiplərin hazırlanma səviyyəsi və texnologiyanın tətbiq imkanları qiymətləndirilir. Layihə həm texniki baxımdan real olmalı, həm də bazarda istifadə edilə bilməlidir. Komandalar texnologiyanın necə işləyəcəyini və tətbiq planını izah etməlidirlər.
5. Komandanın dayanıqlığı. Layihənin uğurla icra olunması üçün komandanın gücü, bacarıqları və layihəni sonadək davam etdirmə potensialı qiymətləndirilir. Burada iştirakçıların peşəkar bilikləri, əməkdaşlıq qabiliyyəti, məsuliyyətlilik və qarşıya çıxacaq çətinlikləri aşmaq bacarıqları nəzərə alınır. Güclü və dayanıqlı komanda layihənin reallaşdırılma şansını artırır.
6. Davamlılıq və sosial təsir. Layihə uzunmüddətli fayda və davamlılıq təmin etməlidir. Sosial və ekoloji təsir də nəzərə alınır, yəni layihənin cəmiyyət və ətraf mühit üçün faydası qiymətləndirilir. Bu kriteriya komandaları yalnız texnoloji və iqtisadi deyil, həm də sosial məsuliyyətli həll təqdim etməyə yönəldir. Komandalar layihənin faydalarını həm qısamüddətli, həm də uzunmüddətli baxımdan izah etməlidirlər.
7. Təqdimatın keyfiyyəti və əsaslandırılması. Layihə aydın, strukturlaşdırılmış və əsaslandırılmış təqdim olunmalıdır. Fikirlər və həll yolları sadə və başa düşülən formada izah edilməlidir. Yaxşı təqdimat qiymətləndirmədə əlavə üstünlük yaradır, çünki ideya asanlıqla anlaşılır və komitə tərəfindən qiymətləndirilir. Komandalar layihələrinin faydalarını və tətbiq imkanlarını inandırıcı şəkildə göstərməlidirlər.

Mükafat fondu
İnnovativ Həllər Marafonu üçün ümumi mükafat fondu 10 000 AZN nəzərdə tutulmuşdur. 1-ci, 2-ci və 3-cü yerlər üçün uyğun olaraq 6 000, 3 000 və 1 000 AZN məbləğ və digər qiymətli hədiyyələr ayrılmışdır.

İdeyana güvənirsənsə, səni fərqlənməyə dəvət edirik!